मुक्तके (पृथ्वी वृत्त)

तहान कुणि ओतली मनतळी अशी साचली
कुणी न शमवी मुळी झळ तिची सुखे साहिली

तिच्याच समिधा तिला बिलगुनी असे राहती
पुरे न मनकामना मृगजळी तरी नाहती..!
***

निरंजन जरी वसे सगुणरूप देहामधे
विलक्षण किती तृषा सहज त्यास ओलांडते

चिरंतन तरी हरे दरक्षणी फसे तो कसा
नवीन वसने नवा सलग जन्म नी लालसा..!
***

पुढे ढकलुनी असे मरण काय साधायचे?
उगाच तन लिंपुनी झुरत काय थांबायचे?

सुकून गळली फुले सहज पाहुनी हासली
हिशोब चुकता करा खत बना म्हणू लागली..!
***
आसावरी काकडे
२.४.२०१७