Friday 22 June 2018

...आहे काही

त्यांना सुद्धा सांगायाचे आहे काही
दुःखाखाली सुखासारखे आहे काही

झाडाने या किती भोगले बहर तरीही
बुंध्यामध्ये हिरमुसलेले आहे काही

बघता बघता कितीक स्वप्ने विरून गेली
तरी मनाला पहावयाचे आहे काही

काल विदेही धुके भेटले आणि उमगले
मुक्ततेतही भोगावेसे आहे काही

नैराश्याने ग्रासुन गेले गुरूच त्यांचे
प्रश्न पडावा असे यामधे आहे काही

ईश्वर म्हणुनी काही नसते म्हणती कोणी
त्या नसण्यातच कुणा वाटते आहे काही..!

आवरले सामान परंतू पाय निघेना
इथे अजूनी थांबावेसे आहे काही
***
आसावरी काकडे
२०.६.२०१८