भेटे नवी राई / नव्या पर्वाच्या प्रतीक्षेत: पडून असते बीज

Wednesday 19 April 2017

पडून असते बीज

जमिनीखालच्या ओल्या अंधारात
पडून असते बीज
अनिमिष वाट पाहात..

अचानक उकलते
निरगाठ
उजेड घुसतो आत
बीज छेदत होतो आरपार
आणि
त्याचे सत्व घेऊन
पडतो बाहेर कोंभ बनून..!

स्वतःतून फुटून
बाहेर पडता येण्याच्या
त्या एका क्षणासाठी
पडून असते बीज
जमिनीखाली
जतन करत
आतली वीज..!
***
आसावरी काकडे
१८.४.२.०१७

No comments:

Post a Comment

मनोगत

आतमधे मळभ असतंच. काहीतरी साचत असतं. रुजत असतं. उगवत असतं आतल्याआत. पण अनेक पावसाळे भोगून झाल्यानंतर रुजण्या-उगवण्याचे, फुलण्या-गळण्याचे नावीन्य ओसरते. नकळत एक तटस्थ अवस्था येते. किंवा मख्ख थकलेपण. पिकलेली फळं पडतात आतल्याआत पण ती उचलून कुणाला द्यावी-दाखवाविशी वाटत नाहीत..!

पण अचानक मरगळ वितळते. चक्राकार गतीत फिरणार्‍या त्याच त्या घटनांमधे ताजेपण जाणवतं. तो क्षण नवी राई भेटवणारा असतो. तिचं हिरवेपण लपेटून मळभही बोलू लागतं... साचलेलं सगळं नव्या ऊर्जेसह उगवू लागतं कवितांमधून..

नव्या राईत भेटलेल्या नव्या कविता इथे सादर करतेय-