भेटे नवी राई / नव्या पर्वाच्या प्रतीक्षेत: पर्णकाफिला

Sunday 2 April 2017

पर्णकाफिला

संपली पानगळ पानफुटी अवतरली
पण पांनांआधी फुलेच बहरुन आली
डौलात उभे हे झाड माळुनी गजरे
पानांची आतुन लगबग चालू झाली..!

मग तहान शोधे बिंदू बुंध्यामधला
डोकावे ज्यातुन हिरवा प्रकाश ओला
आतल्या तमाने मार्ग मोकळा करता
तो पर्ण काफिला चैत्रपालवी झाला..!
***
आसावरी काकडे
१.४.२०१७

No comments:

Post a Comment

मनोगत

आतमधे मळभ असतंच. काहीतरी साचत असतं. रुजत असतं. उगवत असतं आतल्याआत. पण अनेक पावसाळे भोगून झाल्यानंतर रुजण्या-उगवण्याचे, फुलण्या-गळण्याचे नावीन्य ओसरते. नकळत एक तटस्थ अवस्था येते. किंवा मख्ख थकलेपण. पिकलेली फळं पडतात आतल्याआत पण ती उचलून कुणाला द्यावी-दाखवाविशी वाटत नाहीत..!

पण अचानक मरगळ वितळते. चक्राकार गतीत फिरणार्‍या त्याच त्या घटनांमधे ताजेपण जाणवतं. तो क्षण नवी राई भेटवणारा असतो. तिचं हिरवेपण लपेटून मळभही बोलू लागतं... साचलेलं सगळं नव्या ऊर्जेसह उगवू लागतं कवितांमधून..

नव्या राईत भेटलेल्या नव्या कविता इथे सादर करतेय-