भेटे नवी राई / नव्या पर्वाच्या प्रतीक्षेत: जन्मोत्सव

Friday 13 January 2017

जन्मोत्सव

जन्मोत्सव झाला
दृढ झाली नाती
आनंदा गणती
राहिली ना

कोवळेसे ओठ
शब्दांना मिळाले
पारणे फिटले
आनंदाचे

झाले पदार्पण
सुखावली भुई
आनंदली घाई
ओतप्रोत

आनंदा उधाण
येईल येईल
जाणता होईल
बाळराजा

अनुपम्य आहे
जीवन प्राकार
जणू अनुकार
आनंदाचा..!
***
आसावरी काकडे
१३.१.२०१७

आनंदाचा अनुकार - ज्ञानेश्वरीतली उपमा

No comments:

Post a Comment

मनोगत

आतमधे मळभ असतंच. काहीतरी साचत असतं. रुजत असतं. उगवत असतं आतल्याआत. पण अनेक पावसाळे भोगून झाल्यानंतर रुजण्या-उगवण्याचे, फुलण्या-गळण्याचे नावीन्य ओसरते. नकळत एक तटस्थ अवस्था येते. किंवा मख्ख थकलेपण. पिकलेली फळं पडतात आतल्याआत पण ती उचलून कुणाला द्यावी-दाखवाविशी वाटत नाहीत..!

पण अचानक मरगळ वितळते. चक्राकार गतीत फिरणार्‍या त्याच त्या घटनांमधे ताजेपण जाणवतं. तो क्षण नवी राई भेटवणारा असतो. तिचं हिरवेपण लपेटून मळभही बोलू लागतं... साचलेलं सगळं नव्या ऊर्जेसह उगवू लागतं कवितांमधून..

नव्या राईत भेटलेल्या नव्या कविता इथे सादर करतेय-