भेटे नवी राई / नव्या पर्वाच्या प्रतीक्षेत: कोणत्याही क्षणी

Sunday 28 August 2016

कोणत्याही क्षणी

थेंब थेंब थेंब
गळतेय पाणी
संपणार धार
कोणत्याही क्षणी

कोणत्याही क्षणी
दाटतील मेघ
आणि विस्तारेल
काळोखाची रेघ

काळोखाची रेघ
लोपेल जराशी
वीजेचा कल्लोळ
घुमेल आकाशी

घुमेल आकाशी
नाद सावळासा
दाखवेल मोर
दिमाख निळासा

दिमाख निळासा
नाच नाचणार
वाजत गाजत
पाऊस येणार

पाऊस येणार
भरणार पाणी
झरणार धार
कोणत्याही क्षणी..!
***

आसावरी काकडे
२७.८.२०१६

No comments:

Post a Comment

मनोगत

आतमधे मळभ असतंच. काहीतरी साचत असतं. रुजत असतं. उगवत असतं आतल्याआत. पण अनेक पावसाळे भोगून झाल्यानंतर रुजण्या-उगवण्याचे, फुलण्या-गळण्याचे नावीन्य ओसरते. नकळत एक तटस्थ अवस्था येते. किंवा मख्ख थकलेपण. पिकलेली फळं पडतात आतल्याआत पण ती उचलून कुणाला द्यावी-दाखवाविशी वाटत नाहीत..!

पण अचानक मरगळ वितळते. चक्राकार गतीत फिरणार्‍या त्याच त्या घटनांमधे ताजेपण जाणवतं. तो क्षण नवी राई भेटवणारा असतो. तिचं हिरवेपण लपेटून मळभही बोलू लागतं... साचलेलं सगळं नव्या ऊर्जेसह उगवू लागतं कवितांमधून..

नव्या राईत भेटलेल्या नव्या कविता इथे सादर करतेय-