एक दिवस

माझ्या भोवती
हात पाय नाक डोळे त्वचा...
आणि त्यांचे रंगीबेरंगी विभ्रम
यांचं एक रिंगण

आई भाऊ पती शेजार स्नेही
आणि त्यांच्यातले अतोनात गुंतलेपण
यांचं एक रिंगण

अन्न वस्त्र निवारा भाषा कला
आणि त्यासाठी चाललेला रियाज आत-बाहेरचा
यांचं एक रिंगण

समाज देश विदेश पृथ्वी विश्व
आणि त्यांच्याशी अव्याहत होणारी देवघेव
यांचं एक रिंगण...

'खुर्ची का मिर्ची जाशील कैसी..'
म्हणत
मी शोधलेली प्रत्येक फट
बुजवत
प्रत्येक रिंगण
मला आत आत ढकलतं राहातं...

पण यांचा पराभव अटळ आहे..!
यांच्या डोळ्यासमोर
यांना ओलांडून
बाहेर पडेन मी एक दिवस
कुणाला कळणारही नाही..!
***
आसावरी काकडे
१७.८.१६