उगवणे थांबत नाही

निरोप घेता येत नाही
साचलेले संपत नाही
उगवणे थांबत नाही
रुजलेले

येऊ द्यावे येणारे
जाऊ द्यावे निसटणारे
उगा कोणा हाकारे
देऊ नयेत..

शब्द तर वारा केवळ
ओठी ये होऊन कवळ
रिचवून घ्यावे जवळ
येती तेव्हा

नाही तर उगी राहावे
मुळे रोवून असावे
पक्षांसाठी झाड व्हावे
मूक प्रतीक्षेचे

असो नसो आत शब्दाई
व्हावे पालखीचे भोई
प्रस्थानाची कासया घाई
निमंत्रणाआधी..!
***
आसावरी काकडे
८.५.२०१७