तरीही..

दर क्षणाला पडत राहतात
नवनवीन पोस्टस
आणि जुन्या दिसेनाशा होतात
मोबाइल स्क्रीनवरून
वर वर सरकत
जाऊन बसतात ‘ओल्डर’ घरात

क्वचित कधी
टक टक होते दारावर
आणलं जातं कौतुकानं त्यांना
उजेडाच्या स्क्रीनवर..
पण काम होताच लगेच मिटतं दार
त्या पुन्हा पडून राहतात अंधारात
अधांतरी.. तळ्यात-मळ्यात
काही काळ

आणि ‘क्लिअर चॅट’वर टच होताच
अनंतात विलीन होऊन जातात
पुन्हा कधीही न दिसण्यासाठी..!

चिमुटभर राखही उरत नाही मागे
हजारो लाइक्स...
शेकडो कॉमेंटस मिळालेल्या
कोणत्याही पोस्टची..
संपूर्ण ब्रह्मांडाचे सचित्र दर्शन
तिने घडवलेले असले
तरीही..!

***
आसावरी काकडे
१९ मे २०१६