पत्र लिहावे..

खोल आत काही हलले तर पत्र लिहावे
ओठांवर काही अडले तर पत्र लिहावे

ऊन सावली खेळ चालतो इथे सारखा
चुकून खेळी मन हरले तर पत्र लिहावे

आठवणींच्या रंगमहाली मैफल सजता
कुणी अचानक आठवले तर पत्र लिहावे

कोणालाही थोडासुद्धा वेळच नसतो
प्राणातिल कोणी रुसले तर पत्र लिहावे

स्वतःस द्यावे कधी निमंत्रण भेटायाचे
दारच पण उघडे नसले तर पत्र लिहावे

शहीद होता जवान कोणी सीमेवरती
नयनी अश्रू पाझरले तर पत्र लिहावे...!
***
आसावरी काकडे
२०.८.२०१८