आकाश निळे वर सांगत असते काही
पण वस्ती खाली काही ऐकत नाही
हा पूल मधोमध देहासम की आहे
जो जिवा-शिवाच्या मध्ये आडवा येई..!
***
हे रंग गंध रस सारे स्वप्नी हसते
येतात कोठुनी निद्रेला ना कळते
सौंदर्य निरामय स्वप्न असे की भास
जागत्या जिवाला याचे गारुड छळते
***
वा जन्मच झाला दोहोंच्या सीमेवर
निद्रेत स्वप्न अन जागा भास अनावर
हे स्वप्न असे जर जाग न येवो केव्हा
अन भास असे तर अंत न त्याचा व्हावा
****
आसावरी काकडे
१५.७.१७
No comments:
Post a Comment