योजना?

संंदर्भ : ज्ञानेश्वरीतील क्षेत्र-क्षेत्रज्ञ संकल्पना (क्षेत्र - पार्थिव देह, क्षेत्रज्ञ - त्यास जाणणारा. दुसऱ्या भाषेत प्रकृती-पुरूष)

कितीतरी वर्षे झाली
पत्ता तोच आहे
रंग रूप तेच सारे
नाव तेच आहे

जीव रमलाय पुरा
देहाच्या घरात
आत बाहेर वावर
चाले अविरत

क्षेत्र म्हणती घराला
जीव रहिवासी
नित्य नांदतो घरात
तरी परदेसी

सांगतात वसतसे
अंतरी क्षेत्रज्ञ
क्षेत्रवासी असूनही
जीव अनभिज्ञ

येणे-जाणे नित्य आणि
क्षेत्रज्ञ सोबत
तरी जिवा कसे काही
नाही उमगत?

कळू नये अशीच का
असेल योजना
नाहीतर कोण त्याच्या
लागेल भजना?
***
आसावरी काकडे
२६.३.२०१७