भेटे नवी राई / नव्या पर्वाच्या प्रतीक्षेत: अवचित कधी

Saturday, 18 February 2017

अवचित कधी

अवचित कधी
मन फुलझडी होते
सूर्योदयाआधी
आत उजाडू लागते

गंधांचा काफिला
येतो विचारत वाट
अनोखी भूपाळी
गाऊ लागतात भाट

नसताना सण
होते दिवाळी साजरी
भेटला की काय
कुठे राधेला श्रीहरी?

गोंदून ठेवावा
अशा मीलनाचा क्षण
विरहात यावी
फुलझडी आठवण..!!
***
आसावरी काकडे
१८.२.२०१७

No comments:

Post a Comment

मनोगत

आतमधे मळभ असतंच. काहीतरी साचत असतं. रुजत असतं. उगवत असतं आतल्याआत. पण अनेक पावसाळे भोगून झाल्यानंतर रुजण्या-उगवण्याचे, फुलण्या-गळण्याचे नावीन्य ओसरते. नकळत एक तटस्थ अवस्था येते. किंवा मख्ख थकलेपण. पिकलेली फळं पडतात आतल्याआत पण ती उचलून कुणाला द्यावी-दाखवाविशी वाटत नाहीत..!

पण अचानक मरगळ वितळते. चक्राकार गतीत फिरणार्‍या त्याच त्या घटनांमधे ताजेपण जाणवतं. तो क्षण नवी राई भेटवणारा असतो. तिचं हिरवेपण लपेटून मळभही बोलू लागतं... साचलेलं सगळं नव्या ऊर्जेसह उगवू लागतं कवितांमधून..

नव्या राईत भेटलेल्या नव्या कविता इथे सादर करतेय-