नको होऊस कातर

रित्या कातरवेळेला
नको होऊस कातर
खोल रुजलेली बीजे
असतात रे आतुर

असूदेत रापलेला
दे ना हातामध्ये हात
ओरखड्यांमधे आहे
निळी-सावळी सोबत

थोडी ओली थोडी सुकी
स्वप्ने आहेत चुलीशी
उभी अधीर कधीची
नाते त्यांचेही जाळाशी

ऊर्जा त्यांचीच घेऊन
राबू दोघेही एकत्र
लावू सर्वस्व पणाला
जरी थकतील गात्रं

होऊ डोलणारे पीक
किंवा मिसळू मातीत
कुणासाठी कुणीतरी
व्हावे लागते ना खत..?
***
आसावरी काकडे
१८.१२.१६