आता..

आधी दूर होतो तेव्हा
माझ्या मनात रुजायचं
आणि तुझ्या मनात उगवायचं
न सांगताच कळायचं तुला..

मग मी या खोलीतून विचारायची
तू त्या खोलीतून उत्तर द्यायचास
प्रश्न तुला कळलेला असायचा..

आता ऐकू येत नाही नीट
सांगण्या-ऐकण्यासाठी जवळ यावं लागतं..
तरी समजतच नाही नेमकेपणानं..

कसलं असेल हे अंतर?

देहाबरोबर समजही गेलीय थकून
की
आपापल्या परतीच्या वाटेवर
प्रस्थान सुरू झाले आहे आतून?
***
आसावरी काकडे