रस्ते

रस्त्यांना नसती दिशा न कुठला मुक्काम गाठावया
ते खाली असतात केवळ तुम्हा आधार की द्यावया

लाखो लोक प्रवास रोज करती त्यांच्यावरूनी किती
त्यांना भान नसे मुळीच अवघे वेड्यापरी धावती

खाली ते असती पडून नुसते कोणास सांगायचे
खोदा वा उखडा निमूट सगळे जाणून सोसायचे

जेव्हा वर्दळ हो अनावर कुणी खोदून ने खालती
किंवा बांधुन खांब त्यांस वरती टांगून की ठेवती

झाडांचा सहवास दूर करुनी त्या एकटे पाडतो
स्वार्थी माणुस हा किती पदतळी त्यांना असे डांबतो..!
***
आसावरी काकडे
१२.४.२०१७