अज्ञाताच्या हाका

आले आले विमान पण ते
गेले दिसण्यापूर्वी
प्रकाशरेखा टिपुन घेतली
नभात विरण्यापूर्वी..!

स्पर्श कुणाचा झाला नकळे
फुलले अंगोपांगी
आणि माळला मीच आपला
गजरा सुकण्यापूर्वी

कवितेला येतात कोठुनी
अज्ञाताच्या हाका
निःशब्दाच्या गुहेत शिरती
काही कळण्यापूर्वी

ज्योत दिव्याची तेवत असते
तोवर मंत्र म्हणावे
प्राशुन घ्यावे तेज त्यांतले
आशय विझण्यापूर्वी

गाढ तमाच्या गर्द रात्रिला
स्वप्ने सोबत करती
गूज तयांचे जाणुन घ्यावे
नेत्र उघडण्यापूर्वी

अढी घातली आहे नुकती
फळांस झाली घाई
जणू शब्द, जे मौन सोडती
काही सुचण्यापूर्वी

***
आसावरी काकडे
2.4.2019