भेटे नवी राई / नव्या पर्वाच्या प्रतीक्षेत: बहर..

Sunday, 9 September 2018

बहर..

झेप कुंपणा पावेतो
होती, असे वाटलेले
त्याचे झाले मृगजळ
मागे धावत राहिले

विस्तारत गेली झेप
किती क्षितिजे गाठली
परतीच्या वाटेलाही
नवी किरणे दिसली

सारे बहर, वाटले
आता सरले भोगून
झरलेल्या फुलांसवे
गंध गेलाय गळून

पण आतली पुण्याई
पुन्हा आली उजळून
माझा वेडा पारिजात
पुन्हा आला बहरून..!
***
आसावरी काकडे
४.९.२०१८

No comments:

Post a Comment

मनोगत

आतमधे मळभ असतंच. काहीतरी साचत असतं. रुजत असतं. उगवत असतं आतल्याआत. पण अनेक पावसाळे भोगून झाल्यानंतर रुजण्या-उगवण्याचे, फुलण्या-गळण्याचे नावीन्य ओसरते. नकळत एक तटस्थ अवस्था येते. किंवा मख्ख थकलेपण. पिकलेली फळं पडतात आतल्याआत पण ती उचलून कुणाला द्यावी-दाखवाविशी वाटत नाहीत..!

पण अचानक मरगळ वितळते. चक्राकार गतीत फिरणार्‍या त्याच त्या घटनांमधे ताजेपण जाणवतं. तो क्षण नवी राई भेटवणारा असतो. तिचं हिरवेपण लपेटून मळभही बोलू लागतं... साचलेलं सगळं नव्या ऊर्जेसह उगवू लागतं कवितांमधून..

नव्या राईत भेटलेल्या नव्या कविता इथे सादर करतेय-