रान

धुवांधार पाऊस पडून गेलाय
आणि लगेच लख्ख उघडलंय
सुस्नात रान सावरून बसलंय
मोर बाहेर पडलेयत पुन्हा
पक्षीही पंख झाडून झेपावलेत
असंख्य रंगाकार परतलेत
आपापल्या आकारात...
पण गाढ मौनात आहे परिसर अजून
इथे येऊन गेल्याच्या कैक पाऊलखुणा
वाहून गेल्यायत...
नवागतासारखी मी निरखतेय
आसपास नाहीए कुणी रानाशिवाय
अगदी शांत आहे सर्व
तरी असे का वाटतेय
की कुणीतरी घुसमटतंय
कुणीतरी कोंडी केलीय त्याची
एक शब्द फुटत नाहीए
रानाच्या ओठांतून...!

***

आसावरी काकडे
२६.६.२०१८