आज पाण्याच्या मनी काहूर नाही

फूल होणे का तुला मंजूर नाही?
उमल बाळे काळ इतका क्रूर नाही..!

हे खरे की भोवती आहे प्रदूषण
सत्व मातीचे मुळी कणसूर नाही..

दिसत नाही उगवलेला सूर्य अजुनी
शांत आहे दिवसही मग्रूर नाही..!

खूप लाटा उसळल्या अन शांत झाल्या
आज पाण्याच्या मनी काहूर नाही

कैक दिसती मंदिरे अन गोपुरे पण
जळत कोठे भक्तिचा कापूर नाही

माणसाची हाव तैसे माजता तण
नष्ट होणे पीक काही दूर नाही
***
आसावरी काकडे
३१.१.२०१८