भेटे नवी राई / नव्या पर्वाच्या प्रतीक्षेत: आगळा जिव्हाळा

Saturday, 15 July 2017

आगळा जिव्हाळा

एकाकी डोहाला
लाभला आगळा
फुलांचा जिव्हाळा
मौनरंगी..!

मग आकाशही
उतरले त्यात
अक्षरे मौनात
पेरावया

इथून तिथून
वाऱ्याने आणला
गंध लपेटला
त्याच्या भोती

लाभला मधूर
आनंदाचा स्पर्श
डोहामध्ये हर्ष
मावेनासा..!
***
आसावरी काकडे
१५.७.२०१७

1 comment:

Unknown7 November 2017 at 18:20
Akshare kaynaat peraavaya!👌
ReplyDelete
Replies

Add comment

मनोगत

आतमधे मळभ असतंच. काहीतरी साचत असतं. रुजत असतं. उगवत असतं आतल्याआत. पण अनेक पावसाळे भोगून झाल्यानंतर रुजण्या-उगवण्याचे, फुलण्या-गळण्याचे नावीन्य ओसरते. नकळत एक तटस्थ अवस्था येते. किंवा मख्ख थकलेपण. पिकलेली फळं पडतात आतल्याआत पण ती उचलून कुणाला द्यावी-दाखवाविशी वाटत नाहीत..!

पण अचानक मरगळ वितळते. चक्राकार गतीत फिरणार्‍या त्याच त्या घटनांमधे ताजेपण जाणवतं. तो क्षण नवी राई भेटवणारा असतो. तिचं हिरवेपण लपेटून मळभही बोलू लागतं... साचलेलं सगळं नव्या ऊर्जेसह उगवू लागतं कवितांमधून..

नव्या राईत भेटलेल्या नव्या कविता इथे सादर करतेय-