निमंत्रण

स्थल-कालाच्या
कोण्या एका अनाम संधीवर
अनाहूतपणे मिळालं
आयुष्याचं निमंत्रण..!

न मागताच मिळाला
हा देह राहायला
रंग-रूपही नव्हतं सांगितलं
की असं हवं तसं नको..

अगणित पेशींच्या संयोगातून
मिळाले गूण.. अवगूण
आरोग्य अनारोग्य..

जन्मदात्यांनी दिलं नाव
अनाहुताला 'मी'पण आलं
त्यांचं संचित अपसुक 'मी'चं झालं..
'मी'नं कमावलेलं
अहं जोपासू लागलं

माझं नसलेलं
न मागता मिळालेलंही
माझं माझं झालं..
प्रत्येक उच्छवासावर
लफ्फेदार सही करू लागलं..!!
***
आसावरी काकडे
२५.११.१६