प्रतिसाद...

जन्मोजन्मी महाभूते
भेटती जिवाला

देहादारी धाव घेई
वारा निवाऱ्याला

खडकाच्या डोळा कधी
येत नाही पाणी
आपलेच निळे आर्त
दिसते पाषाणी

जन्मक्षणी होतो सुरू
सृजन-प्रवास
उमलणे हा कळ्यांचा
सुगंधी कळस

पैलतीरी गेली सांज
दिस मालवून
खुणेसाठी धूळ थोडी
गात्रांत ठेवून..!

संभ्रमांचे फूल सदा
खांद्यावर डोले
मनातल्या पाखराशी
बावरून बोले

आयुष्याच्या वाटेवर
संचिताचे झाड
पोपटांनी पिंजऱ्याचे
लावले कवाड

संभोगाचा खेळ चाले
आंधळ्या तळ्यात
सृजनाचा रुद्ध टाहो
गोठतो गळ्यात

काळोखाच्या उगमाशी
उन्मळती वेणा
जन्मगंध शोधायला
धावतोय मेणा

अवसेचे भय दाटे
सोबतीला काळा
उगमाला धीर देई
जन्माचा सोहळा..!
**
आसावरी काकडे
१९.४.२०२१