सुटला न दोर आहे

डोळ्यात भूक याच्या चारा समोर आहे
केव्हाच बांधलेला सुटला न दोर आहे..!

आला सुकाळ म्हणुनी ते नाचले परंतू
सत्यात काहि नाही चित्रात मोर आहे

'भिंती' असून उघडे सारे लुटे कुणीही
त्या फेसबूकचाही प्राणास घोर आहे

बाजार मुक्त त्यांचा काही कुठून घ्यावे
सर्वास सर्व दिसते अदृश्य चोर आहे

टाळ्या हव्यात त्यांना ते बोलती प्रभावी
आपापल्या मठातच प्रत्येक थोर आहे

ओसंडती दुकाने उपभोग खूप झाला
जगणे तरी रिकामे  आयुष्य बोर आहे..!
***
आसावरी काकडे
२३.३.२०१८